ಮಲೆನಾಡು ಭಾಗದಲ್ಲಿ ವರ್ಷದ ಮೊದಲ ಮಳೆಯ ಸಿಂಚನವಾಗಿದೆ. ಕಾಫಿನಾಡು ಚಿಕ್ಕಮಗಳೂರು, ಹಾಸನ, ಕೊಡಗು, ದಕ್ಷಿಣ ಕನ್ನಡ ಜಿಲ್ಲೆಯ ಅನೇಕ ಭಾಗಗಳಲ್ಲಿ ಮಂಗಳವಾರ ಸಂಜೆ ಮಳೆಯಾಗಿದೆ.
ಮಳೆಗಾಗಿ ಕಾದು ಬಾಯಾರಿದ್ದ ಭೂಮಿ ತಾಯಿಗೆ, ಸಸ್ಯಗಳಿಗೆ ಮೊದಲ ಮಳೆಯ ಸಿಂಚನವಾಗಿದೆ.
ಚಿಕ್ಕಮಗಳೂರು ಜಿಲ್ಲೆಯ ಕಳಸ, ಶೃಂಗೇರಿ, ಮೂಡಿಗೆರೆ ಹಾಸನ ಜಿಲ್ಲೆಯ ಸಕಲೇಶಪುರ, ಬೇಲೂರು, ದಕ್ಷಿಣ ಕನ್ನಡ ಜಿಲ್ಲೆಯ ಬೆಳ್ತಂಗಡಿ, ಸುಳ್ಯ ತಾಲ್ಲೂಕುಗಳ ಹಲವು ಪ್ರದೇಶಗಳಲ್ಲಿ ಮಳೆಯಾಗಿದೆ.
ಕಳಸ ತಾಲ್ಲೂಕಿನ ಸಂಸೆ, ನೆಲ್ಲಿಬೀಡು, ಕಳಸ, ಹೆಮ್ಮಕ್ಕಿ ಮುಂತಾದ ಕಡೆ ಸಾಧಾರಣದಿಂದ ಉತ್ತಮ ಮಳೆಯಾಗಿದೆ, ಮೂಡಿಗೆರೆ ತಾಲ್ಲೂಕಿನ ಕೆಲವು ಪ್ರದೇಶಗಳಲ್ಲಿ ಉತ್ತಮ ಮಳೆಯಾಗಿದೆ, ಸಕಲೇಶಪುರ ತಾಲ್ಲೂಕು ಹೆತ್ತೂರು ಸುತ್ತಮುತ್ತ ಮಳೆಯಾಗಿದೆ, ಬೇಲೂರು ತಾಲ್ಲೂಕಿನ ಅರೇಹಳ್ಳಿ ಆಸುಪಾಸಿನಲ್ಲಿ ಮಳೆಯಾಗಿದೆ.
ಕಾಫಿ ಹೂವಿನ ಮಳೆಗಾಗಿ ಹಂಬಲಿಸುತ್ತಿದ್ದ ರೈತರಿಗೆ ಮಳೆ ಕೆಲವು ಕಡೆ ಸಂತಸ ತಂದಿದ್ದರೆ ಮತ್ತೆ ಕೆಲವು ಕಡೆ ಕೆಲ ಹನಿಗಳ ಸಿಂಚನವಾಗಿ ನಿರಾಸೆ ಮೂಡಿಸಿದೆ.
ಹವಮಾನ ಮುನ್ಸೂಚನೆಯ ಪ್ರಕಾರ ಇಂದು ರಾತ್ರಿ ಮತ್ತು ನಾಳೆ ಬುಧವಾರವೂ ರಾಜ್ಯದ ಹಲವು ಜಿಲ್ಲೆಗಳಲ್ಲಿ ಮಳೆಯ ಮುನ್ಸೂಚನೆ ಇದೆ.
