ಜೀಪೊಳಗೆ ಅಡಗಿ ಕುಳಿತ್ತಿದ್ದ ಗೋದಿ ನಾಗರ ಹಾವನ್ನು ಸೆರೆಹಿಡಿಯಲಾಗಿದೆ.
ಮೂಡಿಗೆರೆ ಪಟ್ಟಣದ ಬಿಳಗುಳದಲ್ಲಿ ಈ ಘಟನೆ ನಡೆದಿದೆ. ಮನೆಯ ಎದುರು ನಿಲ್ಲಿಸಿದ್ದ ಜೀಪಿನ ಬಾನೆಟ್ ಒಳಗಡೆ ದೊಡ್ಡ ಗಾತ್ರದ ಗೋದಿ ನಾಗರ ಹಾವೊಂದು ಸೇರಿಕೊಂಡಿತ್ತು.
ಬಿಳಗುಳ ವಿವೇಕಾನಂದ ನಗರ ನಿವಾಸಿ ಅಬೂಬಕರ್ ಎಂಬುವವರ ಮನೆಯ ಎದುರು ನಿಲ್ಲಿಸಿದ್ದ ಅವರ ಥಾರ್ ಜೀಪಿನಲ್ಲಿ ನಾಗರಹಾವು ಅಡಗಿ ಕುಳಿತ್ತಿತ್ತು.
ಸುಮಾರು 6 ಅಡಿ ಉದ್ದದ ಗೋದಿನಾಗರ ಜೀಪಿನ ಬಾನೆಟ್ ಒಳಗೆ ಸೇರಿಕೊಂಡಿತ್ತು. ಇದು ಮನೆಯ ಸಮೀಪ ನಿಲ್ಲಿಸಿದಾಗ ಸೇರಿಕೊಂಡಿತ್ತೋ ಅಥವಾ ಹೊರಗಡೆ ಹೋದಾಗ ಸೇರಿಕೊಂಡಿತ್ತೋ ಎಂಬುದು ಸ್ಪಷ್ಟವಿಲ್ಲ.
ವಿಷಯ ತಿಳಿದ ಮನೆಯವರು ಹಾವು ಹಿಡಿದು ರಕ್ಷಣೆ ಮಾಡುವ ಬಣಕಲ್ ನ ಸ್ನೇಕ್ ಆರೀಫ್ ಅವರಿಗೆ ಮಾಹಿತಿ ನೀಡಿದ್ದಾರೆ. ಸ್ಥಳಕ್ಕೆ ಬಂದ ಆರೀಫ್ ನಾಗರಹಾವನ್ನು ಸುರಕ್ಷಿತವಾಗಿ ಹಿಡಿದು ಅರಣ್ಯಕ್ಕೆ ಬಿಟ್ಟಿದ್ದಾರೆ.
