ಬೇಲೂರು : ಕಾಡಾನೆ ದಾಳಿಗೆ ಕಾಫಿ ಬೆಳೆಗಾರ ಬಲಿ

ಕಾಡಾನೆ ದಾಳಿಗೆ ಮತ್ತೊಂದು ಜೀವ ಬಲಿಯಾಗಿದೆ. ಹಾಸನ ಜಿಲ್ಲೆ ಬೇಲೂರು ತಾಲ್ಲೂಕು ಅರೇಹಳ್ಳಿ ಸಮೀಪ ರೈತರೊಬ್ಬರು ಕಾಡಾನೆ ದಾಳಿಗೆ ಬಲಿಯಾಗಿದ್ದಾರೆ.

ಬೇಲೂರು ತಾಲೂಕಿನ ಅರೆಹಳ್ಳಿ ಹೋಬಳಿಯ ಕಣಗುಪ್ಪೆ ಗ್ರಾಮದಲ್ಲಿ ಕಾಡಾನೆ ದಾಳಿಗೆ ರಾಜ ಶೆಟ್ಟಿ(65 ವರ್ಷ) ಎಂಬ ರೈತ ಬಲಿಯಾಗಿದ್ದಾರೆ.

ಇಂದು ಭಾನುವಾರ ಬೆಳಿಗ್ಗೆ ರಾಜು ಶೆಟ್ಟಿ ಕಾಫಿ ತೋಟಕ್ಕೆ ತೆರಳಿದ್ದಾಗ ಕಾಡಾನೆ ಏಕಾಏಕಿ ದಾಳಿ ನಡೆಸಿದೆ.  ರಾಜು ಶೆಟ್ಟಿಯವರಿಗೆ ಎದುರಾದ ಕಾಡಾನೆ ಅವರನ್ನು ಸೊಂಡಿಲಿನಿಂದ ಎತ್ತಿ ಬಿಸಾಕಿದ್ದು, ನಂತರ ಕಾಲಿನಿಂದ ತುಳಿದು ಸಾಯಿಸಿದೆ. ಅವರ ಮೇಲೆ ಮರವೊಂದನ್ನು ಕೆಡವಿ ಹಾಕಿದೆ. ಮಾತ್ರವಲ್ಲ ಮೃತದೇಹದ ಸ್ವಲ್ಪ ದೂರದಲ್ಲಿಯೇ ಆನೆ ನಿಂತಿದ್ದು, ಸ್ಥಳೀಯರು ಸ್ಥಳಕ್ಕೆ ಹೋಗಲು ಭಯಪಡುವಂತೆ ಮಾಡಿತ್ತು. ಸದ್ಯ ಕಾಡಾನೆಯನ್ನು ಅಲ್ಲಿಂದ ಕಾಡಿಗೆ ಓಡಿಸಲು ಅರಣ್ಯ ಸಿಬ್ಬಂದಿ ಕಾರ್ಯಾಚರಣೆ ನಡೆಸುತ್ತಿದ್ದಾರೆ.

ಈ ಭಾಗದಲ್ಲಿ ಹತ್ತಾರು ಕಾಡಾನೆಗಳ ಗುಂಪು ನಿರಂತರವಾಗಿ ಉಪಟಳ ನೀಡುತ್ತಿದ್ದು, ಹಲವಾರು ಜೀವಗಳು ಈಗಾಗಲೇ ಬಲಿಯಾಗಿವೆ. ಈಗ ಸಾವಿನ ಸರಣಿಗೆ ಮತ್ತೊಂದು ಜೀವ ಸೇರಿದೆ. ಜನರು ಭಯದಿಂದ ಬದುಕುವ ಸ್ಥಿತಿ ನಿರ್ಮಾಣವಾಗಿದೆ. ಅರಣ್ಯ ಇಲಾಖೆ ಸಮಸ್ಯೆಗೆ ಶಾಶ್ವತ ಪರಿಹಾರ ನೀಡುತ್ತೇವೆ ಎಂಬ ಭರವಸೆ ಬರೀ ಕಾಗದದ ಮೇಲೆ ಉಳಿದಿದೆ. ಅದು ಕಾರ್ಯರೂಪಕ್ಕೆ ಬರುವುದು ಯಾವಾಗ ? ಇನ್ನೆಷ್ಟು ಜೀವಗಳು ಬಲಿಯಾಗಬೇಕು ? ಎಂಬ ಪ್ರಶ್ನೆಗಳು ಸ್ಥಳೀಯರನ್ನು  ಕಾಡುತ್ತಿವೆ.