ಕಾಫಿ ಕೇವಲ ಒಂದು ವಾಣಿಜ್ಯ ಬೆಳೆ ಮಾತ್ರವಲ್ಲದೆ, ದೇಶದ ಮಲೆನಾಡಿನ ಮಣ್ಣು, ಜನಜೀವನ ಮತ್ತು ಸಂಸ್ಕೃತಿಯ ಅವಿಭಾಜ್ಯ ಭಾಗವಾಗಿದೆ. ವಿಶ್ವದ ಜನರಿಗೆ ಆಹ್ಲಾದಕರವಾದ ಪಾನೀಯವನ್ನು ಕೊಡುಗೆಯಾಗಿ ನೀಡುತ್ತಿರುವ ಕಾಫಿ ಬೆಳೆಗಾರರು, ಕಾರ್ಮಿಕರು ಹಾಗೂ ಉದ್ದಿಮೆದಾರರ ಪರಿಶ್ರಮ ಅತ್ಯಮೂಲ್ಯವಾದುದು ಎಂದು ಕೋಮಾರ್ಕ್ ಮಾಜಿ ಅಧ್ಯಕ್ಷ ಡಿ.ಎಸ್. ರಘು ದುಂಡುಗ ಹೇಳಿದರು.
ಅವರು ಗುರುವಾರ ಮೂಡಿಗೆರೆ ತಾಲ್ಲೂಕಿನ ಕುನ್ನಹಳ್ಳಿ ಗ್ರಾಮದಲ್ಲಿ ಅಂತರಾಷ್ಟ್ರೀಯ ಕಾಫಿ ದಿನಾಚರಣೆ ಅಂಗವಾಗಿ ನೆಸ್ಲೆ ಕಂಪನಿಯಿಂದ ಆಯೋಜಿಸಿದ್ದ ಕಾಫಿ ಸಂಭ್ರಮ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿದರು.
ಇತ್ತೀಚೆಗೆ ಕಾಫಿ ಉತ್ಪಾದನಾ ವೆಚ್ಚ ಹೆಚ್ಚಾಗಿದ್ದು, ರಸಗೊಬ್ಬರದ ಬೆಲೆಯೇರಿಕೆ, ಕಾರ್ಮಿಕರ ವೇತನ ಹೆಚ್ಚಳ ಸೇರಿದಂತೆ ಕಾಫಿ ಬೆಳೆಗಾರರು ಹಲವು ಸವಾಲುಗಳನ್ನು ಎದುರಿಸುತ್ತಿದ್ದಾರೆ. ಇಂತಹ ಸಂದರ್ಭದಲ್ಲಿ ನೆಸ್ಲೆ ಯಂತಹ ಸಂಸ್ಥೆಗಳು ಕಾಫಿ ಬೆಳೆಗಾರರಿಗೆ ಉತ್ತೇಜನಕಾರಿ ಬೆಲೆ ನೀಡುವುದರ ಮೂಲಕ ಪ್ರೊತ್ಸಾಹ ನೀಡುತ್ತಿರುವುದು ಶ್ಲಾಘನೀಯ ಎಂದರು.
ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದು ಮೂಡಿಗೆರೆ ತಾಲೂಕು ಬೆಳೆಗಾರರ ಸಂಘದ ಅಧ್ಯಕ್ಷ ಬಿ.ಆರ್. ಬಾಲಕೃಷ್ಣ ಮಾತನಾಡಿ ಜಾಗತಿಕ ಕಾಫಿ ಮಾರುಕಟ್ಟೆಯಲ್ಲಿ ನಡೆಯುತ್ತಿರುವ ಬದಲಾವಣೆಗಳು, ವ್ಯಾಪಾರದ ತಂತ್ರಗಳು ಹಾಗೂ ಮಾರುಕಟ್ಟೆಯ ನಿರೀಕ್ಷೆಗಳನ್ನು ಬೆಳೆಗಾರರು ಅರ್ಥಮಾಡಿಕೊಳ್ಳಬೇಕಾದ ಅಗತ್ಯವನ್ನು ಅವರು ವಿವರಿಸಿದರು. ಕಾಫಿ ಬೆಳೆಗಾರರು ಒಗ್ಗಟ್ಟಾಗಿ, ಪರಸ್ಪರ ಸಹಕಾರದೊಂದಿಗೆ ಹಾಗೂ ಸಾಮೂಹಿಕ ಚಿಂತನೆಯೊಂದಿಗೆ ಕೆಲಸ ಮಾಡುವ ಮೂಲಕ ಕಾಫಿ ಸಮುದಾಯದ ಅಭಿವೃದ್ಧಿಗೆ ಕೊಡುಗೆ ನೀಡಬೇಕು ಎಂದು ಕರೆ ನೀಡಿದರು.
ಈ ಸಂದರ್ಭದಲ್ಲಿ ಮೂಡಿಗೆರೆ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಕೆ.ಎ. ರವಿ, ಹಳೆಮೂಡಿಗೆರೆ ಗ್ರಾಮ ಪಂಚಾಯಿತಿ ಮಾಜಿ ಅಧ್ಯಕ್ಷ ಶಿವಾನಂದ ಕೆ.ಆರ್. ಶ್ರೀ ಉಡುಬಿ ಅಮ್ಮ ಸೇವಾ ಸಮಿತಿ, ಕುನ್ನಹಳ್ಳಿ ಅಧ್ಯಕ್ಷ ಎಸ್.ಆರ್. ರವೀಂದ್ರನಾಥ್, ತಾ.ಪಂ. ಮಾಜಿ ಸದಸ್ಯೆ ಶ್ರೀಮತಿ ಭಾರತಿ ರವೀಂದ್ರನಾಥ್ , ಜೆಸಿಐ ಮೂಡಿಗೆರೆ ಮಾಜಿ ಅಧ್ಯಕ್ಷ ಕೆ.ಕೆ. ಪ್ರದೀಪ್**, ಹಿರಿಯ ಕಾಫಿ ಬೆಳೆಗಾರರಾದ ಕೃಷ್ಣೇಗೌಡ ಕೆ.ಎಸ್, ರವಿ ಡಿ.ಎಸ್, ಪ್ರಮೋದ್ ಕುಮಾರ್ ಎಚ್.ಆರ್, ಪ್ರದೀಪ್ ಕುಮಾರ್ ಬಿ.ಎಸ್. , ಪ್ರದೀಪ್ ಕುಮಾರ್ ಎಚ್.ಆರ್., ಬಾಲರಾಜ್*, ಶ್ರೀ ಉಡುಬಿ ಅಮ್ಮ ಸೇವಾ ಸಮಿತಿಯ ಪದಾಧಿಕಾರಿಗಳು ಹಾಗೂ ಸಮಿತಿ ಸದಸ್ಯರು ಉಪಸ್ಥಿತರಿದ್ದರು.
ನೆಸ್ಲೆ ಕಂಪನಿ ಶಿವಕುಮಾರ್ ಅವರು ಪ್ರಾಸ್ತಾವಿಕವಾಗಿ ಮಾತನಾಡಿ **“ಕಾಫಿ ಸಂಭ್ರಮ”ದ ಯೋಜನೆ, ಸಿದ್ಧತೆ ಹಾಗೂ ಕಾರ್ಯಗತಗೊಳಿಸುವಿಕೆಯಲ್ಲಿ ನಿರಂತರ ಹಾಗೂ ಅಮೂಲ್ಯ ಬೆಂಬಲ ನೀಡಿದ ಮುದ್ರೆಮನೆ ಅಗ್ರಿ ಕಮಾಡಿಟೀಸ್ ಮತ್ತು ಎಂ.ಎಸ್. ಕಾಫಿ ಕ್ಯೂರರ್ಸ್ ಅವರಿಗೆ ಕೃತಜ್ಞತೆ ಸಲ್ಲಿಸಿದರು.
ಕುನ್ನಹಳ್ಳಿ, ದುಂಡುಗ, ಹಳಸೆ, ಕೆಲ್ಲೂರು, ಬೀಜುವಳ್ಳಿ ಹಾಗೂ ಸುಂಕಸಾಲೆ ಸೇರಿದಂತೆ ಸುತ್ತಮುತ್ತಲಿನ ಗ್ರಾಮಗಳ ಕಾಫಿ ಬೆಳೆಗಾರರು, ಗ್ರಾಮಸ್ಥರು ಹಾಗೂ ಕಾಫಿ ಸಮುದಾಯದ ಅನೇಕರು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸಿ ಕಾರ್ಯಕ್ರಮಕ್ಕೆ ವಿಶೇಷ ಮೆರುಗು ತಂದರು.
ಕಾರ್ಯಕ್ರಮದ ಪ್ರಮುಖ ಆಕರ್ಷಣೆಯಾಗಿದ್ದು **ನೆಸ್ಲೆ ವತಿಯಿಂದ ಆಯೋಜಿಸಲಾದ ಕಾಫಿ ಸೆನ್ಸರಿ ಎವಾಲ್ಯುಯೇಷನ್ ಮತ್ತು ಕಪ್ಪಿಂಗ್ ಸೆಷನ್**. ಕಾಫಿಯ ಗುಣಮಟ್ಟ, ರುಚಿ, ಸುವಾಸನೆ, ಕಾಫಿಯ ವೈವಿಧ್ಯಮಯ ಗುಣಲಕ್ಷಣಗಳು ಹಾಗೂ ಜಾಗತಿಕ ಮಾರುಕಟ್ಟೆಯಲ್ಲಿ ಗುಣಮಟ್ಟದ ಕಾಫಿಗೆ ಇರುವ ಮಹತ್ವದ ಕುರಿತು ಬೆಳೆಗಾರರಿಗೆ ಅರಿವು ಮೂಡಿಸಿದರು, ಉತ್ತಮ ಗುಣಮಟ್ಟದ ಕಾಫಿ ಉತ್ಪಾದನೆಯು ಕಾಫಿ ಬೆಳೆಗಾರರ ಸಮೃದ್ಧಿ ಹಾಗೂ ಇಡೀ ಕಾಫಿ ಸಮುದಾಯದ ಅಭಿವೃದ್ಧಿಗೆ ಹೇಗೆ ಸಹಕಾರಿಯಾಗಬಹುದು ಎಂದರು.
ಕಾರ್ಯಕ್ರಮದ ಕೊನೆಯಲ್ಲಿ ಆಯೋಜಿಸಲಾದ **ವಿನೂತನ ಮೋಜಿನ ಆಟಗಳು ಹಾಗೂ ಮನರಂಜನಾ ಚಟುವಟಿಕೆಗಳಲ್ಲಿ** ಕಾಫಿ ಬೆಳೆಗಾರರು ಅತ್ಯಂತ ಉತ್ಸಾಹದಿಂದ ಭಾಗವಹಿಸಿದರು. ವಿಜೇತರಿಗೆ ಬಹುಮಾನಗಳನ್ನು ನೀಡಿ ಗೌರವಿಸಲಾಯಿತು.
ಕಾರ್ಯಕ್ರಮದ ವಿಶೇಷ ಆಕರ್ಷಣೆಯಾಗಿ ಕಾಫಿ ಬೆಳೆಗಾರರು **ಸಾಂಪ್ರದಾಯಿಕ ಉಡುಗೆಯಲ್ಲಿ ಭಾಗವಹಿಸಿ ಸಂಭ್ರಮಿಸಿದರು. ಪುರುಷರು ಸಾಂಪ್ರದಾಯಿಕ ಧೋತಿ/ಪಂಚೆಯಲ್ಲಿ ಹಾಗೂ ಮಹಿಳೆಯರು ಸುಂದರ ಸೀರೆಗಳಲ್ಲಿ ಭಾಗವಹಿಸಿ, ಮಲೆನಾಡಿನ ಸಂಸ್ಕೃತಿ, ಪರಂಪರೆ ಮತ್ತು ಕಾಫಿ ಸಮುದಾಯದ ಸೊಬಗನ್ನು ಅನಾವರಣಗೊಳಿಸಿದರು.
