ನವೆಂಬರ್ 9ರಂದು ನಡೆದ ಜಿಲ್ಲಾ ಸಹಕಾರ ಒಕ್ಕೂಟದ ನಿರ್ದೇಶಕರ ಸ್ಥಾನಕ್ಕೆ ನಡೆದ ಚುನಾವಣೆಯಲ್ಲಿ ಮಹಿಳಾ ಪ್ರತಿನಿಧಿಯಾಗಿ ಬಿಜೆಪಿ ಬೆಂಬಲಿತ ಅಭ್ಯರ್ಥಿ ಶ್ರೀಮತಿ ಭಾರತಿ ರವೀಂದ್ರ ಆಯ್ಕೆಯಾಗಿದ್ದಾರೆ.
ಸಹಕಾರ ಯೂನಿಯನ್ ಚುನಾವಣೆಯಲ್ಲಿ ಕಾಂಗ್ರೇಸ್ ಬೆಂಬಲಿತ ಅಭ್ಯರ್ಥಿ, ಜಿಲ್ಲೆಯ ಹಿರಿಯ ಸಹಕಾರಿ ಬಿ.ಸಿ. ಗೀತಾ ಅವರ ಎದುರು ಸ್ಪರ್ಧಿಸಿದ್ದ ಭಾರತಿ ರವೀಂದ್ರ ಜಯ ಗಳಿಸಿರುತ್ತಾರೆ. ಪ್ರತಿ ತಾಲ್ಲೂಕಿನ ಪ್ರತಿನಿಧಿಗಳನ್ನು ಒಳಗೊಂಡ ಒಟ್ಟು 11 ಮತಗಳನ್ನು ಹೊಂದಿದ್ದ ಚುನಾವಣೆಯಲ್ಲಿ ಭಾರತಿ ಮತ್ತು ಬಿ.ಸಿ.ಗೀತಾ ತಲಾ 5 ಮತಗಳನ್ನು ಪಡೆದಿದ್ದರು, ಅದೃಷ್ಟ ಪರೀಕ್ಷೆಯಲ್ಲಿ ಭಾರತಿಯವರು ವಿಜಯಶಾಲಿಯಾದರು. ಮತ್ತೋರ್ವ ಸ್ಪರ್ಧಿ ಶ್ರೀಮತಿ ಭಾನುಮತಿ ಒಂದು ಮತಗಳನ್ನು ಪಡೆದರು.
ಅನುಭವಿ ಮತ್ತು ಪ್ರಭಾವಿ ಅಭ್ಯರ್ಥಿ ಬಿ.ಸಿ.ಗೀತಾ ಅವರಿಗೆ ಸರಿಸಮಾನ ಸ್ಪರ್ಧೆ ನೀಡಿ ವಿಜಯಿಶಾಲಿಯಾದ ಭಾರತಿಯವರಿಗೆ ಜಿಲ್ಲಾ ಬಿಜೆಪಿ ಅಧ್ಯಕ್ಷರು, ಹಿರಿಯ ಮುಖಂಡರು, ವಿಧಾನ ಪರಿಷತ್ ಉಪಸಭಾಪತಿ ಎಂ.ಕೆ. ಪ್ರಾಣೇಶ್, ವಿಧಾನಪರಿಷತ್ ಸದಸ್ಯ ಸಿ.ಟಿ. ರವಿ ಸೇರಿದಂತೆ ಹಲವರು ಅಭಿನಂದನೆ ಸಲ್ಲಿಸಿದ್ದಾರೆ.
ಭಾರತಿ ಇವರು ಮೂಡಿಗೆರೆ ತಾಲೂಕು ಹಳಸೆ ಸುಂಕಸಾಲೆ ಗ್ರಾಮದವರಾಗಿದ್ದು, ಇವರ ಪತಿ ರವೀಂದ್ರ ಅವರು ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರ ಸಂಘದ ಸಿಇಓ ಆಗಿ ನಿವೃತ್ತಿ ಹೊಂದಿದ್ದಾರೆ.
ಭಾರತಿಯವರು ಮೂಡಿಗೆರೆ ತಾಲ್ಲೂಕು ಪಂಚಾಯಿತಿ ಮಾಜಿ ಅಧ್ಯಕ್ಷರು. ಹಳೆಮೂಡಿಗೆರೆ ಪ್ರಾರ್ಥಮಿಕ ಕೃಷಿ ಪತ್ತಿನ ಸಹಕಾರ ಸಂಘದ ಮಾಜಿ ಉಪಾಧ್ಯಕ್ಷರು ಹಾಲಿ ನಿರ್ದೇಶಕರಾಗಿರುತ್ತಾರೆ. ಹಾಗೂ ಮೂಡಿಗೆರೆ ಮಹಿಳಾ ವಿವಿಧೋದ್ದೇಶ ಸಹಕಾರ ಸಂಘದ ಮಾಜಿ ಅಧ್ಯಕ್ಷರು ಹಾಲಿ ನಿರ್ದೇಶಕರು ಹಾಗೂ ಮೂಡಿಗೆರೆ ತಾಲೂಕು ಬಿಜೆಪಿ ಮಹಿಳಾ ಮೋರ್ಚಾದ ಮಾಜಿ ಅಧ್ಯಕ್ಷರು ಆಗಿರುತ್ತಾರೆ.
ಬಿಜೆಪಿ ಪಕ್ಷದಲ್ಲಿ ಸಕ್ರಿಯವಾಗಿ ಗುರುತಿಸಿಕೊಂಡಿದ್ದಾರೆ, ಇದೀಗ ಜಿಲ್ಲಾ ಸಹಕಾರ ಯೂನಿಯನ್ ನಿರ್ದೇಶಕರಾಗಿ ಆಯ್ಕೆಯಾಗಿದ್ದಾರೆ.
